失敗月餅

今年發神經唔知點解想整月餅, 最重要係我唔喜歡食月餅既人係,連冰皮月餅都未食過, 只係覺得半島既奶皇月餅都唔錯, 不過都唔算喜愛.

其實都想左一個星期要做定唔做好, 不過成日都心思思想試反正屋企有個月餅怪, 做出來一定有人幫我消滅就試做下.

星期日一早10點起身就開始整..仲要係一次過做冰皮同奶皇月餅.

可惜2款月餅都係失敗收場. 個冰皮既皮就OK(我終於試左人生第一啖既冰皮)HOHO..個皮真係唔錯味道就係似糯米滋, 敗係個綠豆餡完全係一PAT野好難包呀.失敗失敗
做完個冰皮個人都已經半死, 不過我都唔屈服一心一意寄望係個奶皇月餅度....點知都係爛尾收場...唔知點解入爐後就D餅就下陷咁我都唔知邊度出錯, 其實包時個皮餅都好似溶溶地咁, 唔知係唔係咁既關係, 同埋我跟食譜就話220度焗8分鐘, 再250度焗5分鐘.

後來賽後檢討時再查下其他食譜人地就分3段焗, 唔知係唔係我係焗時出錯...希望大家高人可以俾D意見同心得我.

由早上10點無停手做到下午4時先做完,跟住做左一粒鐘清潔.