2014瑞典芬蘭幸運之旅~ Day 10 (Helsinki)

01/02/2014

雖然火車行得快而不穩, 但我出奇地訓得好好而且佢地既床真係幾舒服令到我都可以訓到佢廣播先醒呀!!!

我地早上7時多就已經到達火車站
今次住既酒店同樣係火車站對面認真方便. 可惜今次就無咁好運可以早D俾我地check in,只可以放低行李就出去等麥記開門入去食個早餐兼上網決定下我地今日既行程.



今日天氣勁差勁大雪, 一早已係街上見到多部鏟雪車係路面鏟雪, 但都無阻我地出門行景點既意志!!(其實又無房間更係無奈要出去走走)

先去買左張48hr 交通卡(後來我地先發現買這張卡認真唔抵就算要買都係買24hr已經好足夠)我地係Helsinki2日真係好小坐到tram, 只有去芬蘭堡一定要坐船, 其他時間我地都係行路多, 就算我地問路佢地都係教我地行亦唔建議我地坐tram.

今日第一個景點係烏斯佩斯基大教堂 Uspenski Katedraali.我地由火車站行左起碼30分鐘先俾我地找到, 但去到見到無開果刻都幾失望. 好彩見到旅遊巴上來, 跟住我地就開始查番D旅遊資料先發現我地未夠10時就上來更係未開. 好彩都係等多10分鐘就開門啦, 我地亦入去參觀下.


可能自己之前實在睇得太多大教堂, 其實係Helsinki既教堂真係好一般(個人認為)影完相我地又再去下一景站~赫爾辛基大教堂 Tuomiokirkko

我地亦係行極都找唔到這個教堂明明就話行10分鐘就到,我地唔識又問路都係攪左成30分鐘先到達!!







當時天氣都幾差雪亦無停過天氣亦非常凍呀....我都曾經想放棄唔去芬蘭堡架, 但團友話都來到碼頭附近不如就去埋啦反正時間尚早又唔知去邊加上明天天氣亦唔知好定壞, 最後我地就決定坐船入芬蘭堡.



行去碼頭附近見到有D路邊檔, 行完D檔仔我地就要找去芬蘭堡碼頭估都估唔到就係D檔仔再行前少少就係可惜我地當日又行錯方向.幸好問完路去到果碼頭岩岩有船唔洗食碼頭等食西北風, 我地即跑去拿拿聲上船呀!!



十幾分鐘後就到達芬蘭堡. 第一時間更係走入去旅遊中心取個地圖先.

跟住我地行過橋去左炮台果邊行下.其實係想搵個國王門既, 但我真係無能為力行到上炮台高處風勁大真係吹到我企都企唔穩, 而我地事後亦懷疑積雪太多蓋左個國王門.反而我地係這邊就見到3個人落左去結冰既湖度溜冰真係開心.



花左大部分時間都搵唔到國王門之後, 我地亦過會對面想睇下其他景站.行景站前見到一間餐廳有開門更係入去食左午餐同時休息下先實在太凍...

小小既店舖只得幾張枱就已經坐滿晒旅客, 幸好有人岩岩要走我地先有張2人枱舒舒服服坐底休息一下.
點左個紅菜頭湯同甜批同團友分享. 平時係香港對紅菜頭認真麻麻, 但來到芬蘭覺得D紅菜頭特別甜又好味, 而用來做湯第一次飲就已經愛上.
食飽要走時, 已經有好多人湧入來可能這間餐廳係島上唯一會開既餐廳啦.

我地食飽就想入去島上既教堂睇下, 點知當日話有人結婚無開到..接二連三想入去既景點既門都無開, 我都唔知係我地行錯路見門就開定係當日真係有好多景點都無開放.
 最後我地決定走人啦...反正岩岩有班船要來!!
事後回港再望下夏天既芬蘭堡真係同冬天係二回事, 亦係一個好靚好值得去既地方, 可惜我地遇上係冬天仲要當日天氣唔算好加上星期六啦, 可能真係好多景點都無開啦...反而我地就咩都睇唔到...希望有機會再來芬蘭時再來芬蘭堡睇下.

回到Helsinki都已經2點左右, 我地原本係想試下坐電車回火車站, 可惜真係唔識睇佢地D路牌指示呀..我地最後都係行番去亦順便係附近shopping下.




 回到酒店取埋房間又再落去行多一陣.晚上亦太累都係都附近快餐店買左D炸雞回酒店食飽休息下好過!!







留言

熱門文章