2014瑞典芬蘭幸運之旅~ Day 3 (Stockholm-Tallinn-Helsinki)

25/1/2014
第3天一早8時就起身, 原因我地一早買左早餐券見到好多人都介紹話船上BUFFET好多選擇又美味, 我地無訂晚餐buffet就更係要試下早餐都係每人Euro10都唔錯.

我地唔知係唔係早去相比晚餐真係少好多人, 而且食物選擇都唔錯, 最重要有我最喜歡既三文魚真係好肥美,我都不知不覺食左7,8片呀.仲有佢地既乳酪同樣美味, 估唔到早餐都有鵝肝, 我地2條友真係慢慢嘆左1小時, 平時係香港食飯都沖沖沖, 去旅行更係輕鬆D唔好急咁先叫休息.

食飽後回船倉執下野hea下又準備下船啦....

今日只係塔林半日行程, 再接回Tallinn siljia船公司既船回Helsinki, 所以我地D行李只需寄存係同一個terminal就可以.

好衰唔衰我預塔林太多野行, 所以訂左晚上9:30既船, 但同行友人怕回到Helsinki成11點幾有D危險怕無車, 所以我地第一時間去counter問下可唔可以轉早一班船5:30, 點知係要加錢先可以換.

我初時都唔想, 所以我決定入去塔林望下有無野行先決定要唔要換票.

點知我地2條友行到去舊城行到1點已經覺得無咩野行又凍又無咩店開又唔知有咩景點, 最後我地仲入左一間餐廳再食個午餐又hea多一個鐘都係無計要回碼頭俾錢轉船.

最終要俾多Euro 38先可以走人...激死我...這程真係仲貴過我由stockholm -Tallinn, 不過無計啦我地仲以為塔林好多野睇唔夠時間....唔緊要我地輕鬆D又去碼頭附近個mall行下又有我至愛既超市行行行, 就準備落船回Helsinki.

再見塔林!!!

我發現今次係船上超市好似無Stockholm-Tallinn咁平, 所以我都無再入貨. 係船坐左2小時上網又睇下戲就晚上7時回Helsinki啦

係碼頭坐Tram9回火車站, 今晚住係火車站旁既Holiday Inn Hotel超值既一晚, 撞正有優惠只係Euro35仲平過住Euro Hostel.

回到酒店出去行左一陣就回去休息, 明天又係一早坐車出機場入Ivalo.