2014瑞典芬蘭之旅住宿篇

2月 12, 2014

2014瑞典芬蘭之旅住宿篇

去旅行更係想住得好少少, 但無奈歐洲既酒店都偏貴. 平平無奇既酒店都要1千蚊一晚, 仲要唔係咩集團酒店呀又無拖鞋又可能無風筒無洗頭水護髮素架...反而東南亞地區既酒店如果付上咁既價錢已經住得好房又大架啦...
不過我喜歡去歐洲, 所以每次都會帶備所需用品.而係歐洲選酒店, 我都唔會太多要求, 只係要近地鐵站/市區, 房間清潔就OK. 今次住既酒店都算滿意,這一篇就想同大家分享我這11天所住既酒店感受!!

瑞典斯德哥爾摩
Stockholm Inn Hotel(Euro 69)

初時選係Stockholm既酒店都幾麻煩, 因只住一晚加上第2天要去碼頭上船, 所以我地一開始就鎖定要找近碼頭既酒店, 可惜我地又想下住係碼頭反而出入市區會極之唔方便. 每次都要行去地鐵都要十幾分鐘, 係夏天更係無問題但我地冬天仲要負幾度既環境真係行多一步都唔願.
不過係市區/近碼頭既酒店一點都不便宜, 間間都要1千以上.有一天無意中見到這間叫Stockholm inn Hotel既房,睇相都唔錯只係無窗, 望下地圖都好似幾近地鐵仲要此酒店係一條景點大街地利一流. 唯一考慮就係我地去及走時都係在Central station出發,拖行李都要十幾分鐘. 最後我地出發前1個月終於決定試下住這間, 因價錢太吸引只係付上我們原訂果間既一半價錢.
去到當日跟隨網站指示由火車站行去酒店都非常容易, 原路都唔需要問路只係花左10分鐘就可以順利拖行李到達酒店. 加上我地12點到佢地仲俾我地提早check in仲要俾左間大D既房間我地.
這間酒店都有提供免費早餐, 雖然只係一件三文治一杯橙汁及一杯茶/咖啡, 但對我地來講已經好滿足. 唔洗再花時間去搵早餐食都算係咁, 另外值得一讚係這間酒店仲要有寄存行李真係極度方便.
當然佢都有缺點就無佢地所有房都無窗全部房都在地庫, 加上房內燈光不足入到去都幾暗. 如果大家喜歡光猛又一定要有窗就要考慮下.

當然以價錢及方便度都屬4粒星(5星為滿分)

芬蘭斯德哥爾摩

Holiday Inn Helsinki City Centre(Euro 35)

這一間真係成個旅程可以話我出去旅行咁多次訂得極之便宜既一間酒店, 講都唔信只係歐羅35..真係筍價. 我地原本係booking.com訂左Euro 100, 當時我地都仍然覺得好唔抵因為這一間酒店我地真係留幾粒鐘就走, 原定晚上11點幾先check in, 第2日早上6時就check out要俾成1千真係有D肉赤. 初時仲想訂近碼頭既Euro Hostel, 但我地太早出門又無車到火車站坐機場巴士. 有一日又係咁好彩撞正Holiday Inn官網自己做優惠, 順理成章我地用左超值價平過住Hostel入住這間酒店又唔洗同人share bathroom. 咁既價錢更係無包早餐, 不過都唔緊要當日我地6點就走人更係唔要早餐都無問題反正我地都享用唔到.

講番點解要選這間酒店原因好簡單就係火車站係酒店隔離方便我地坐機場巴士.酒店房間都幾闊又舒服唔錯.

其實以原價來住都算合理價, 值得推介.

芬蘭Saariselka

Santa's Hotel Tunturi(Euro 95.30)

這間酒店都有好多不同房間選可以享受好D就選D有廚房及sauna, 好似我地咁就只係住D普通房間就算. 選擇這間是覺得近滑雪場地覺得如果早上無咩活動都可以去滑下雪...加上巴士都有停這個站都叫幾方便免左找巴士站同出外等車之苦.

房間都算幾大唔錯, 只可惜房同reception距離唔近係房唔可以上wifi, 有時想check極光指數都要專登行去reception上網先得.

附近都有好多不同safari公司可以提供雪地活動參加(經酒店訂亦可以), 行去超市就要5分鐘. 如果唔想行佢地都有架shuttle bus行經超市及滑雪場地每人每日就俾5歐羅任坐架啦.

這間早餐都係自助形式不過款式就唔多都係一般火腿, 炒蛋, 乳酪等味道一般. 食客亦唔多.

不過以想睇極光來講我覺得這裡地理環保就好麻麻, 想行遠D睇極光又好遠又無路牌指示, 附近四周都有好多街燈又無咩空曠地方.

但如果大家早上無參加咩雪地活動, 可以行去附近玩下滑雪都唔錯.

整體上睇極光就唔多建議, 反而為左來滑雪住這裡就一流!

芬蘭Inari

Hotel Inari (Euro 242)

這一間應該都唔洗多介紹都勁多人會住既酒店. 原因好簡單就係行出湖邊睇極光非常方便(如果有極光睇既話)

我地第一晚住無sauna另一晚就有. 我地原本已經要求無sauna果晚要lake view, 點知check in時老闆話我地第一晚就無第二晚會住佢地酒店最好既房間成間房所有窗都可以睇到湖景, 所以我地都無咩所謂.

這間同樣係巴士就停係酒店前面非常方便, 而超市亦係馬路對面. 但此區只有一間Safari公司仲要好多活動都唔多, 加上附近無咩野行無咩野玩. 如果早上無參加雪地活動都幾悶. 不過來旅行休息下hea下都可以.

另外佢地提供既早餐款式都多少少起碼有我至愛既煙三文魚, 不過果2天好多人住好多食物都俾人掃清而補足又唔算快手, 所以想食多少少都幾難, 而且房間又係收唔到Wifi要上網同樣要出reception.

此店既老闆真係幾好人, 我地第二日走時, 巴士一早到來老闆都會好窩心提醒住客巴士到啦好快D準備上車唔好錯過. 其實早餐係7時先供應, 唔知係唔係老闆知好多人都係坐7時05分既巴士,佢地早餐供應提早到6:45開始供應另一窩心服務.

整體來講酒店地理及服務都係5星呀....以專程來睇極光既話我都會建議大家住這間酒店. 起碼湖邊就係酒店隔離唔洗行好遠先有機會睇度. 如果大家入住有sanua近湖邊既房, 基本上係房內都可以睇到極光又或者一邊焗sanua一邊欣賞極光都可以.(因為我地最後一晚就係咁樣睇度微微既極光)

芬蘭Rovaniemi

Guesthouse Boreailis (Eur 84)

選擇這一間只係見到大部份Blog友都住而且近火車站方便第二天我地坐火車. 價錢一點都不便宜, 但設備及服務都認真麻麻, 算係我整個旅程最差既住宿.

雖然佢話近火車站, 但其實都要拖行李上斜落斜, 係雪地拖行李都已經夠辛苦仲要加上斜路就更加苦上加苦.

房間唔算好大勉強開到一個大及一個小行李箱, 房內沒有熱水煲只有樓下公用廚房有, 而廚房只開到晚上9點煮野食/煲水請提早回酒店攪掂.

最唔好就係沖涼熱水唔夠呀...沖沖下會覺得好似D凍水咁真係攞命.另外想向reception服務員問路係一D都幫唔到手,覺得有D九唔搭八.例如我想問佢係邊度坐咩車去動物園, 佢只係簡單話行出去有個車站就係, 等我仲以為有蓋既車站. 點知係行遠D既巴士總站...另外一日問點去聖誕老人村, 只係話行去火車站等, 點知係去到火車站內既總站, 如果唔係巴士司機指示,我地2條友真係呆呆企係一個係巴士位但巴士唔會停站既位上車.

還有這間野係無行李寄存..真係估佢唔到.

這間野只係較近火車站, 但服務及設備只屬2星. 去到先覺得原來住係市區酒店/聖誕老人村反而仲方便呀...反正價錢都唔算吸引服務又麻麻又唔係特別方便.

芬蘭斯德哥爾摩
Sokos hotel vaakuna(Euro 102)

這一間又係以優惠價訂下, 正正去時Helsinki做緊Winter Fun優惠有幾間酒店都有特別優惠, 咁岩俾我見到這間原本都要Euro 180左右一晚架.原本訂左Holiday Inn都要Euro 110仲要無包早餐更係試下住這間, 係地圖又話這間近D火車站仲要4星酒店更係試啦.
講真論距離與火車站計Holiday Inn同佢真係差不多啦..如果佢無這個優惠真係唔算抵住. 如果要以原價來講Holiday Inn好似新過佢啦,此終這間酒店都幾舊下不過maintain得唔錯算係咁...不過咁既酒店原來唔係間間房有好普通既水煲真係吹脹.

早餐初時都以為普通啦..又估佢唔到出奇地多款式味道都唔錯. Refill野都算快手架, 不過當日都好多人好多時都要搭枱一起食早餐架.

整體來講又係方便極近火車站落樓下就係Shopping Mall又有超市, 同樣有行李寄存, 早餐豐富. 設備以4星就只屬一般. 服務人員都係好一般啦....以優惠價入住就叫抵啦..如果要俾Euro 180我就建議大家住回Holiday Inn好過.