胡椒餅(附食譜)

這個星期日真係由早煮到晚, 對於唔係成日煮野既我來講都叫過足癮 

這一個食譜又係我想整好耐, 不過又係拖到今時今日先整. 

用冷藏法, 對於我心急既人係一個好好既方法免左等個麵團發酵之苦. 

這個食譜我係跟大師級~仙姐既食譜; 不過我無用豬油改用菜油, 發酵就用左冷藏法

當然整出來無佢咁靚, 不過自己都好滿意

食譜(10個) 

水皮: 高粉120G; 低粉120G; 菜油 10G, 糖5G, 水130G, 鹽2G, 酵母4G 

1)先將水加入酵母待3-5分鐘,將所有材料(除菜油)攪拌搓至麵團

2)搓好後再加入菜油, 搓到麵團起筋及有薄膜(其實我搓這個麵團一點都唔痴手叫好易搓, 但我搓左好耐都起唔到薄膜, 最終搓左20分鐘都無薄膜就放棄)

3)蓋上濕布等15分鐘就用保鮮紙包起再放入保鮮袋雪過夜.

第二日準備做餅時就取出麵團待20-30分鐘等麵團回至室溫

餡料: 碎豬肉200G(我都係亂買左18元), 蔥隨自己喜愛

1)將豬肉調味, 都係離不開, 生抽, 生粉, 糖, 酒及最重要既胡椒.今次我係用原粒胡椒自己磨碎, 所以食時如咬到有少少胡椒粒就更香. 

先將油皮及水皮分割10份(油皮16G; 水皮36G)

1)將水皮包油皮, 再壓成長舌狀, 由上至下卷起 (問題來, 仙姐食譜就做一次就可以, 但見有其他食譜就話要重復這個步驟3-4次, 咁樣先令到個酥餅有層次, 所以大家自己決定)

2)卷起後再左右2邊摺向中間

3)掍圓壓成圓形包肉餡, 再收到8成時加入蔥, 最後收口成圓形, 輕輕壓扁, 再搽蛋汁及沾上白芝麻

4)靜止30分鐘, 預熱焗爐至180-200度; 焗20-25分鐘

其實整個過程最難真係包個餅, 最慘係包左9個之後第10個先開始掌握到少少技巧