龍鳳廚坊@太子

呢間係食潮菜, 入去個時可能時間尚早,
真係人唔多, 但越坐就越旺, 走個時係滿座.

今日一行三人,
席中有人叫到豬肺湯,
就話要飲, 所以先來一個杏汁豬肺湯.
再來, 問侍應有乜特色菜,
佢介紹左招牌碌鵝,
話係用汁碌好多次,
熟隻鵝, 又滑又嫩
中間另一個朋友, 見到龍蝦做特價
問左唔算貴, 咁佢擇左芝士龍蝦伊麵
最後, 想點碟菜, 呢樣係最無所謂
侍應聽到就提議食春菜煲,
話所有材料都係佢地自己擇的新鮮菜.

先來一個杏汁豬肺湯,
老實講, 依家仲記得當時的杏汁香氣
飲落口都好清潤
湯濃不在話下, 就算湯渣都仲幾有味, 唔錯


再來上菜係碌鵝
望落唔算特別,
夾上手仲覺得有點肥
但食落口又唔同喎...
同介紹一樣, 又滑又嫩
同埋好入味, 我個人就幾喜歡

再上的菜式係, 龍蝦伊麵
雖然係本地蝦, 但新鮮劏始終比較有鮮味
龍蝦肉彈牙, 配伊麵底就係絕配

最來係個春菜煲
簡單菜式, 但相信春菜同蘿蔔都算料好
真係好清甜, 湯底結果又係清埋
今晚真係算飲湯都飲飽