2016挪威之旅~ Day11（Oslo市內觀光)

16/06/2016

早晨呀!!!!經過10小時既車程, 二條死屍終於可以落車啦.我地今晚住既酒店好近火車站, 由火車站去酒店都係5分鐘左右既路程, 由於我地都係早上8時左右到達預左無房俾我地啦, 所以放低行李我地就走去食早餐, 跟住商量下行程.

 一大清早Oslo繁華大街Karl Jonans Gate都係得幾個人. 一大清早照理我地應該吸下新鮮空氣好精神咁行下街享受一下, 可惜2條死屍實在太累都無咩心機, 最後去左全世界出名既麥記食早餐算啦!!
這裡既早餐有Bagel食又唔錯, 無記錯好似都係三十幾蚊算係咁架啦!!起碼可以俾我地坐下hea下.

食飽休息左一陣2個人都有番少少電, 原本我今日係想坐船去Bygdoy 島行下, 但睇我地2條友精神同體力都唔算好, 所以我地決定都係附近行下就算.

第一站團友話要去睇孟克的畫, 所以就去左Oslo國立美術館. 最估唔到係這裡唔收錢仲可以影相. 我地都係預花1小時左右就可以睇完.點知這裡的畫實在太精彩太吸引, 連平時唔太識欣賞都會慢慢睇左影右影, 所以最終我地花左近2小時先離開展館.

北歐的教育真係唔錯, 細細過就會帶佢地來美術館, 而且佢地個個都好乖好靜唔會轉走. 其實中途都見到有中學生, 小學生都入來參觀!!

不過大家有機會來奧斯陸我都會推介入來這個美術館行下, 反正都唔洗錢唔岩隨時離開都可以.

行完都差不多12時半我地係附近既超市又買下野行下

1點左右我地到The Royal Palace (中午13:30有交接睇) 準備1:30PM就開始, 不過唔好講笑烈日當空睇交接都幾攞命, 幸好中間都有D涼風吹下唔係已經唔夠訓仲要咁樣曬發真係幾易暈低.

 我地睇完都2點左右去左買盒外賣就番酒店睇下有無房攞.間房好大呀..我地3點取房各人沖好涼再食左午餐..2條友都唔理啦訓醒先算.

3點幾訓到成6點先起身, 大家精神都好好多, 同團友就起身去搵食. 因為我地這幾天真係無咩點洗錢最尾這幾天都剩幾千銀係身講真又無咩野買, 超市花極都係有限錢, 所以將D錢花係食度就最開心. 無咩目的亂入一間食飯算數,
2個人叫左個一份燉什肉同青口, 份量都幾大下...幸好時間多慢慢hea食吹下水. 這一間相比係前一晚既味道就好味得多啦..
食飽係大街再行一陣我地就番酒店休息啦..