Channel 3 Tapas Bar & Restaurant@太子

早2星期同約朋友出來吹下水, 一早訂位這裡服務都幾細心. 我早2星期前訂位, 聽電話果位先生仲好細心問我咁早訂位係唔係有朋友生日, 宜家有咁貼心既服務真係估唔到.

前一日再打來確認時就再同我講, 因為當晚人客多用膳時間只可以俾2小時我地. 咁當然如果無人係出面等位就可以繼續坐啦.

我地準時7時來到, 估唔到全場滿座. Friday night真係多人出來飲酒食野...這間都係酒吧格局入面都幾黑下又有大電視, 環境係真係幾嘈下架, 不過簡唔中來熱鬧下我又接受到. 起碼音樂唔會大聲到我地朋友吹水都聽唔到.

食物價錢都中等不算特別貴, 酒水都叫合理價錢就算唔飲酒都有D無酒精mocktail都係幾十蚊左右.
我地5個人叫左西班牙海鮮飯, 蔬菜牛肋條, 西班牙小食拚盤; 乳豬件, 薄餅同埋德國豬手.

成晚我覺得D食物都好有水準, 特別喜歡個豬手及薄餅, 豬手做得外皮脆肉入味仲有D醬汁相比去連鎖店專食德國豬手更加美味, 用來配酒真係一流.
 另外薄餅多料薄餅底好鬆脆, 估唔到酒吧都食到美味既薄餅.

乳豬件都幾特別配埋多士一齊食,食時又覺得減低肥膩感.

至於西班牙飯同牛肋條都只覺一般份量亦偏小,

小食拚盤亦覺麻麻地, 無咩特別小食只有幾片辣腸, 忌廉芝士包煙三文魚, 同埋炸薯仔球, 好似無咩特色

整體上食物樣樣都做得唔錯, 喜歡熱鬧這裡一定岩晒, 而且服務個個都好貼心, 最後我地都係坐到10點走人都無人趕我地走.

地址: 太子通菜街228號地下