2017 ~墨爾本塔斯之旅 Day 2 ( Freycinet National Park & Bicheno)

09/04/2017

前一日預定左機場接送未夠6點已經到達機場, 自助寄行李同check in後, 我地入左機場食左輕型早餐, 我又忙於整個電話上網之後就上機. 1小時既機程真係好快就過, 未夠9點我地已經攞埋行李同車就出發我地真正第一日既旅程.
今日全日車程都唔算好多,輕輕鬆鬆過一日.

我地今次由Launceston 玩回 Hobart, 今次我地都係租Avis 6天租車加埋$0墊底費合共Aud 590. 原本打算開車去Ross食個早餐先, 但我地唔算肚餓而且安排中午去Freycinet Marine Farm食蠔, 所以Ross就後日先去.

今日天氣唔好全日都下雨, 但都無影響我地旅行心情, 開左大約2小時車程終於到左第一站.
到時人都唔多,我地輕鬆搵到枱坐底慢慢睇下有咩好食. 這裡除左生蠔之外都有好多其他熱/凍海鮮選擇. 今日我地食左海膽, 半打什錦生蠔, 檸檬煮青口同帶子.





 講真這裡的蠔真係非常一般好細又無咩味道; 反而我更喜歡佢地既熱海鮮帶子同青口都做得好出色,煮得剛好又鮮味. 這一餐只係Aud 65真係抵. 最衰要開車唔係飲杯白酒配海鮮慢慢嘆就正.

估唔到食完之後, 就好多人來到. 我地食飽都出發去Freycinet National Park (Wineglass bay)行下山.首先到公園旅遊中心買左個入場証先, 我地打算去3個國家公園, 所以買個Aud 60 pass比較化算(單一個就Aud 24; 如果入3個以上就買個為期8星期的套票)
詳情可以參考官網:
http://www.parks.tas.gov.au/?base=914

原本預算花2-3小時行下山, 但雨愈落愈大加上訓唔夠.我地都係行到 Wineglass bay lookout就算, 大約來回都不用1小時既短線行程. 這裡國家公園有好多不同既行山徑架有長有短. 今日既路段好平坦易行.







行完山番停車場攞車時, 已經見到袋鼠周圍行等人餵食啦...這裡真係通處可以見到袋鼠.

我地今晚會去Bicheno住順便睇下好唔好運可以見到企鵝回巢. 我地回住宿前已經去左超市買左D食物, 估唔到這個小鎮都有個超市都幾大下, 另外還有一間好大既Liquor store. 
我地大約3點幾到達, 但屋主已經唔係度留下一封信俾我指示我泊車同間屋位置. 
好喜歡這裡地方唔大, 但樣樣野都提供到估唔到鹽, 黑椒, 茶包, 咖啡都有提供. (之前去挪威真係咩都無提供)




咁早回來更係早食早休息, 但由於我地網絡仲未開通, 而我地2條友仔又想玩Pokemon, 而這裡住宿係無wifi供應, 但房間有提示話出去visitor center就有公共wif. (只係不足2分鐘車程), 所以2條傻皮又走出去停係visitor center門前係度..............update pokemon.HAHAHAHA.

跟住幾天我地都係好早回小屋早晚餐再去散下步就早訓. 今晚食羊扒, 素意粉同蒸蔬菜. 我係超市買左包2蚊都唔洗既甘筍食足我6日. 這裡的甘筍真係好甜, 簡單蒸出來已經好好味,另外羊扒亦係我地既至愛. 

食飽之後, 我地就行去對面海邊睇下有無企鵝. 出到來雨後有彩虹真係好開心.當然我地亦見唔到企鵝啦...跟住入黑我地亦有出去再望一次..HAHAH..當然更係無野睇啦..一來我地都唔岩時間, 後來查番係要日落時先係企鵝回 巢時間.

另外我原本係想去附近Blowhole睇果到噴水, 點知我過左5日後先發現自己無去到...有遺憾先可以令我下次再來一次!!



P.S -即日超巿攻略:行程當日有經過兩個超巿,都是IGA(非IGA Express)。Campbell Town和Bicheno,由於時間早兼順路,仲有澳洲入境限制,身邊水都無支,經過第一個小鎮Campbell Town就已進行補給。呢個超巿有齊凍肉和水果,補給都叫ok。最估唔到去到Bicheno間IGA更加大, 而且肉既供應更多, 如果大家早到Bicheno不妨可以到達先作補給.

住宿:
Tidelines of Bicheno Apartments

留言

熱門文章