韓國首爾之旅~ DAY 5 (雪獄山及加平)

10月 04, 2017

韓國首爾之旅~ DAY 5 (雪獄山及加平)

21/09/2017

住係束草都係方便今日一早可以去雪獄山國立公園. 我地住宿距離公園都只係15分鐘車程, 非常便利. 前一日已同民宿主人要求8點左右食早餐, 我地都唔敢太遲起身, 因為佢地會直接送早餐到房間...好輕便但又美麗的早餐...見到都非常開心,
另外每間房仲有提供自己磨咖啡豆同沖咖啡的壺.

食完早餐執埋行李9點左右我地就交房出發去雪獄山國立公園...這裡停車要收費,即時付錢俾工作人員就會安排你泊車既地方...無記錯每架車收5000won.

原來這個公園都要收入場費, 每人3500won. 我之前睇左話坐纜車多人起上來, 分分鐘要等1小時...我地怕失預算, 所以第一站就去坐左先..反正友人腳傷左我地都唔會可以行咩遠程山徑路段..

纜車來回每人10000won, 幸好我地都算早來到公園, 等左大約20分鐘都可以坐到上纜車...原來佢地都係得2部纜車行走來回線, 幸好就係佢地部車都行得非常快, 上山都係唔洗2分鐘就到達

初時以為上山會有幾條行山路段,我地都諗住選下D短程行下...點知上到來先知係得一個山...大家只不過坐纜車上來睇下這個山頂...而山頭已經非常多人..我爬左上山頂(只係花2分鐘左右)影左一陣相就落番山腳同友人會合, 跟住見到又有隊團體上左來,我地就決定坐纜車落山啦..怕一陣要等坐纜車.

落左去我地就係公園入面再亂行一通...這個公園都好大, 這裡開始就有好多不同行山路段, 我地都係亂行一陣大約12時左右就決定離開.

中午就決定去民宿老闆介紹的燒魚作午餐....入左佢標明的停車場..去到原來係付費停車場...唔識路既我地更係泊車最好..

原來佢叫我地泊車既地方, 本來好多餐廳都係食燒魚...不過我地都堅持去佢介紹的比較穩陣..

這間叫88烤魚. 這店源海邊一路向藍橋方向一直行就會見到寫88牌就係架啦..都唔難搵..

我地入到來大部份見到都係韓國人...咁岩有位亞姐又識講中文...基本上都唔洗問2人入來一定係要叫2人份餐...

跟住就上來幾款配菜, 湯同一碗飯, 跟住送上火紅紅炭盤, 2人份見到都有好似6-8款魚及魷魚

全程都係有人幫你燒不用動手呀...講真這一餐我地都食得非常開心同滿足...其實望真D佢地D魚都唔係咩特別魚..有D我地平時係香港都可以食到..例如鯖魚, 秋刀魚...

盛盤魚我地只有一款魚我地唔岩食...究竟咩魚我都唔知...只係知道成個肚都係大大粒魚春..但果D魚春好似食膠咁味道非常怪...

這一餐每人14000won.

食完見泊車果度好似仲有時間, 我地就順便係附近行下當散步落下格..原來附近都係有名既景點..只怪我真係無做足功課..這個街市內有一間話好出名既外賣炸雞..不過我地好飽加上份量好嚇人..我地都無意慾買來試.

行完啦...見都下午3時都係出發去我地今晚既住宿度仲好...明天去南怡島, 所以選既民宿係南怡島對面..環境一流亦係咁多晚中我地最喜歡...不過係山頭晚上都幾鬼凍下...這位民宿主人係女士, 好似唔係太識英文有D難溝通..我地來同走佢都好熱情咁係門口等我地..攪到我地都無辦法係佢門口影下佢D咁靚既公仔...