2018年克羅地亞之旅- DAY 7 PAKLENICA - Plitvice Lakes (Rakovica)

31.03.2018


今日係我最期待既行程就係去Plitvice Lakes National Park(16湖),可惜查左天氣都應該下雨天啦...唔理啦...食左個早餐就出發去到先算.

由住宿去16湖大約1.5小時啦....原來沿途都有D大型超市架, 所以唔洗好似我地咁怕無經過, 所以一早係附近D細超市入左一埋貨啦...

今日係31號亦係最後一天可以平價飛入埸..我就係貪心啦..就晒咁既時間,又預計希望4月1日就會開放埋上湖啦...唉..人算不如天算..

當日我地係大約11時左右就到, 我地就去左2號停車場, 不過唔知點解免費泊車喎!!!見到車場都有厚厚積雪加上落雨中, 天氣更加凍啦....不過估唔到當日既人流都勁多16湖既吸引力真係唔弱.

其實都幾辛苦架, 人又多雨愈落愈大, 行下又要等前面同自己影相...真係好辛苦又無咩癮!!
我地都係跟住人流群行, 影下相唔知點樣行就行到去有得坐船既地方, 跟住我地又跟住人地去坐下船仔啦...第二天我地先知原來我地由下湖坐船去另一邊就係上湖既方向啦..跟住見到人流就行上山啦..(原來果度有車接駁可以去回下湖).不過當日我地又唔知又唔識就直接等船坐回去下湖啦

 

 





後來真係雨愈落愈大愈密, 我地成腳都濕晒...最終行左3小時左右我地就決定離開公園, 決定明天再來行.

其實係16湖附近真係有好多住宿選擇, 我地選左離公園有10分鐘車程既Apartment.
我地愈來愈早回到住宿處, 今日幫我地check in仍然係一位小朋友, 真係叻啦...介紹房既設施呀..收錢等都非常詳細好鬼正!!
今日間房相比細好多, 但對住佢地家既大後園好舒服架...

我地4時左右就開始HEA, 咁鬼多時間我早幾日買左條麵包食左我地幾日都未食完..加上油多..就用左整個吉列豬扒...食到友人同自己都大滿足.

今晚就早D休息, 明天又一清早起身去行上湖區.