2015~澳洲之旅 Day10 Cairns (大堡礁潛水)

今日我地去潛水啦,但我地參加Silverswift 去3個外礁,而這個活動係無包接送, 所以我地要自己行去碼頭, 真係一日比一日早起...7點就要去到碼頭排隊交錢

交完錢我地就行去上船度等啦, 今日我地就係坐這隻船啦!!!我地無潛水牌, 所以我地就參加左一次深潛加每個島既無限浮潛.

上船之後我地要參加深潛就要去到船底部坐安排教練同我地講解.
這個活動包早, 午, 茶餐, 一上船食左個muffin飲杯咖啡先, 怕一陣落水凍更加無力...船上有個香港教練好自然地我地同另外2個香港女仔都係跟這個教練.

今次我地會去3個外礁, 而我地安排係第2個外礁深潛, 所以當船泊係第一個外礁時, 我地2個就去浮潛下先...不過我第一次落水覺得好凍, 所以我完左20分鐘就上水休息, 怕一陣去深潛時會唔舒服.

上船一陣就開船去第2個礁, 教練就即刻叫我地埋位再作講解, 到我地出發時就一個拉住一個咁同教練一齊潛水. 不過講真我一D都唔enjoy, 又要拉住教練又要拉住隊友, 有時又要check下個樽又時有要影相(俾人影), 攪到我係水底好忙都無咩點樣細心睇下D魚呀...忙完一輪就上水啦...我都唔知自己睇左咩魚...

上水教練會問大家仲有無興趣再深潛多次, 我就無啦不過友人就非常大癮佢又再次報名係第3個礁潛水...

深潛後又到午餐時, 我更係又食一大埋食物填肚補充體力, 跟住就上左船上晒下太陽訓一陣, 而友人亦同時要忙去準備第2次深潛...

我訓醒無耐就到左第3個礁啦..深潛既人落左水後, 浮潛既人士亦開始落水..我更係唔蝕底都落去睇下...嘩...估唔到第3個礁係最靚好多珊瑚礁好易就見到好多不同既魚, 可惜相機係友人度唔係我一定勁影相, 不過唔緊要自己欣賞下都好開心..我今次自己一個游到好遠去不同珊瑚礁睇...跟住估計友人都差不多深潛完就上船搵佢, 點知當大家準備再去遠D浮潛既時候亦係要上船既時間..不過大家都認同這個礁係最多不同既魚同最特別...

上船後沖身換好衫就食左小小茶點就回去啦...係船上仲派埋証書...今次既大堡礁潛水係我地潛水之中最難忘, 我地亦計劃下次再來亦要去大堡礁潛水.

番到碼頭我地又再去超市買少少蔬菜煮埋最後一份既肉去....回酒店途中俾我地發現原來平時我地行果條路成日都好嘈, 初時只會覺得係D雀仔叫得咁大聲, 點知今日我地先發現係蝙蝠..仲要好多隻係D樹上.!!


今晚食完飯我地亦無再出去行, 又係要早休息為明天激流留力!!