St Betty @ IFC

難得一日假期無咩野做, 帶住2隻小魔怪到IFC亂行一通. 大家都覺得有點累時, 原本只係想去名模開既蛋糕店食件CAKE飲杯茶. 基於假日關係出面都無晒位置可以坐, 最終我地就決定走入ST BETTY HIGH TEA坐底休息下.

3個人我地只叫左1份二人既AFTERNOON TEA SET再另加多杯野飲.

原先睇左D食評都話此店既服務只屬一般, 以咁既收費真係唔值, 但當日以我自己覺得尚算唔錯, 起碼點餐都叫有笑容. 我可以話佢地唔算熱烈既服務, 但亦不算太差. 加水亦有主動為我地加添一次咁啦..都叫OK. 如果想靜靜坐係度, 佢地D服務員盡對俾到你...佢地真係唔算好主動理客人, 但你一叫佢地都會即來為你服務既...服務我覺得尚可接受啦.

至於食物都唔錯, 我地叫既HIGH TEA SET既食物真係唔錯, 特別係咸點我同侄女都十分欣賞.底層既咸點我就食左個燒青椒配牛油果醬三文治, 個蔬菜好甜配上鬆軟既麵包十分美味. 侄女亦話佢既三文魚亦好肥美鮮甜...旁邊既芝士PUFF亦同樣美味一粒細細既PUFF估唔到有咁香濃既芝士味. 

再來中層既SCONE我亦同樣欣賞, 鬆化既牛油鬆餅亦時有陣陣牛油香而不油膩, 有少少失望反而係佢地既果醬, 可能我個人較喜歡有好多果肉既果醬, 此店提供唔算岩我口味.

再上就係上層既甜品, 我大部份都無食到, 只係食左一小啖侄女俾我試左中間杯慕斯酸酸甜甜味道都唔錯, 不過唔算有太大驚喜.

大致上食物都唔錯, 而飲品亦同樣出色, 叫左杯凍朱古力俾小朋友飲, 來時已經見到濃濃朱古力飲落真係似食緊朱古力咁香濃, valrhona品牌做出來既朱古力飲品真係一流.

而另外叫既PINEAPPLE ICED JASMINE TEA又係美味, 香濃既菠蘿再配上清香既茉莉茶十分配合美味.

美食加上環境真係好令人RELAX & ENJOY.