Tequila on Davis@西環

自從有左堅尼地城地鐵站後, 西環一帶都熱鬧左就算星期四晚6點多去到都好難搵到位泊車.
今次係見到食評介紹此店有仙人掌沙律而來...

我地7時到達基本上都唔需要點樣訂位, 佢地都係叫係坐樓下果層, 我地2個人點左個仙人掌沙律, 炸魷魚同埋雞肉墨西哥卷..

一來就係個炸魷魚估唔到份量咁多...不過這一個魷魚炸得好香口再配果酸甜醬又真係好好味, 再來就係我最期待仙人掌沙律, 一直都唔知仙人掌係咩味..不過講真食落都無咩特別, 估計個仙人掌本身無咩味道只係用個醬汁來調味...這個仙人掌沙律都幾開胃因為佢地用橙汁做個醬汁底...有大量蔬菜夠晒健康

再來既墨西哥卷同樣特別平時食果D都係一塊TACO/SOFT TACO再包餡料, 今次這個卷就好似個麵包咁再去炸...外有少少脆而內就包有大量雞絲同車打芝士非常美味, 再配埋旁邊既辣醬, 黑豆同飯非常可口..

不過這裡份量都好大, 好似我地2個人叫左3樣野食得都幾吃力..