Day 7~巴黎遊(凡爾賽宮)

查左天氣報告今日天氣好不過就凍左少少, 唔緊要最重要係無下雨就最岩去凡爾賽宮.
一早出發去坐火車直達凡爾賽宮,經過約一小時既車程 又係火車上回一回神後落車又成個人醒神晒.一落車後行5-10分鐘就見到好大個皇宮啦.基本上跟住人潮行包無行錯.

這一個宮殿極顯當時路易十四既富裕, 仲要係大到可以舉行典禮, 晚會等活動. 講真呀,家都係細細地先覺得溫暖.不過入面既裝潢同畫真係有氣派, 當我行到鏡廳時真係令我"嘩"一聲. 由400多塊鏡組合而成, 加上24台巨大既水晶吊燈真係好華麗.

仲有世界最大既壁畫放係天花板

單單行宮殿內部已經花左3小時, 中午時分我地就開始要行出花園外參觀另外係一邊興建既宮宮殿. 相比之前既宮殿這裡就無咁金碧輝煌, 不過同樣都係咁極富華麗.

這個花園真係好鬼死大, 天氣好好多人都係花園度跑步真係健康. 無啦啦係花園度見到一大埋羊群咁攪野.

天氣好正坐下係湖邊休息下欣賞下天鵝, 水鴨幾寫意

終於到了回程時候, 由早上11點半行到3點半差不多4點真係咩都夠皮. 當我地行回火車站要坐車既時候, 點知個職員封左成個入閘位,講一大埋法語令我望到呆呆滯滯.後來見到有個遊客用英文問佢咩事之後,應該係暫時無左火車, 叫大家行去另一個車站上車.又來..係倫敦又係無啦啦要行多個車站, 宜家來到法國都係無啦啦要行去另一個車站先坐到車...如果這件事發生係香港, 地鐵一定俾人罵死..但我地身在外地無咩可以講唯有照跟人行啦.明明都已經好累, 仲要行多20-30分鐘路程真係有點想死.

行到車站後, 就見到有架巴士將頭先好似同我地一起係車站睇封閘既人, 相信應該係有接駁巴士, 可惜我地唔識又唔知係邊度坐啦.

最後回到巴黎, 我地今晚再去老佛爺SHOPPING...拿拿拿行路同SHOPPING係二回事, 明明行左成大半日路, 但二條友仔都有腳骨力再SHOPPING, 女人真係天生購物狂....行完街街後我地決定今晚再去LEON食晚飯, 今次就係OPERA附近果間分店. 嘩...入到去先發現原來間間分店既價錢會有分別, 這一間平過係香榭麗舍大道幾蚊EURO真係厲害.今日行左咁多路, 大家都肚餓, 所以我地決定叫SET 即係前菜+主菜; 友人就叫主菜+甜品.今次叫左個青口煲, 友人就叫左好似大蝦,魷魚青口. 今次既青口同樣美味, 相比用芝士焗青口更加鮮甜而不油膩.
最估唔到係佢地既甜品WAFFLE同樣美味, 帶少少微暖好鬆軟比起英國果件所謂比利時WAFFLE好味好多,係巴黎食咩甜品都咁正.

食到飽一飽又係散步回酒店, 咁樣又一日.